Get the latest news at
your fingertips!
Download our app now
LIVE TV
Search
കൊച്ചി: അപ്രതീക്ഷിതമായി ജീവിതത്തിലേക്ക് കടന്നെത്തിയ ആപത്തിൽ ചേർത്തുപിടിച്ചവർക്ക് നന്ദി പറഞ്ഞ് ആശുപത്രിയിൽ വിവാഹിതയായ ആവണി. എല്ലാവരോടും തീർത്താൽ തീരാത്ത നന്ദിയുണ്ടെന്നും മൂന്ന് മാസത്തിനകം എഴുന്നേറ്റ് നടക്കാനുള്ള അവസ്ഥയിലേക്ക് എത്തുമെന്ന മനോധൈര്യം തനിക്കുണ്ടെന്നും ആവണി പറഞ്ഞു. ചികിത്സയിൽ കഴിയുന്ന വിപിഎസ് ലേക്‌ഷോർ ആശുപത്രിയുടെ ഔദ്യോഗിക സോഷ്യൽ മീഡിയ പ്ലാറ്റ്‌ഫോം വഴിയാണ് ആവണിയുടെ പ്രതികരണം.
'ഞാൻ എന്റെ ഡ്രീം ഡേക്ക് വേണ്ടി മേയ്ക്കപ്പ് ചെയ്യാനായി പോയതാണ്. പക്ഷെ ഇതാ ഇപ്പോൾ ഇങ്ങനെ കിടക്കുകയാണ്. വന്ന സമയത്തെ പോലെയല്ല ഇപ്പോൾ ഒരുപാട് മാറ്റം വന്നിട്ടുണ്ട്. ഒരുപാട് ബെറ്റർ ആയി. വന്നപ്പോൾ എനിക്ക് കാൽ ഉണ്ടെന്ന് പോലും അറിയില്ലായിരുന്നു. ഇപ്പോൾ കുറേയധികം ഭേദമായിട്ടുണ്ട്' ആവണി പറയുന്നു.
'വന്ന സമയത്ത് മനോധൈര്യം തീരെയില്ലായിരുന്നു. നിങ്ങൾക്കത് വീഡിയോ കാണുമ്പോൾ മനസിലാകും. കല്യാണം കഴിക്കേണ്ട, താലികെട്ടേണ്ട എന്ന് പറഞ്ഞ് ഞാൻ കരയുകയായിരുന്നു. ഞാൻ നടക്കുമെന്ന് എനിക്ക് ഒരു ഉറപ്പുമില്ലായിരുന്നു. അത്രമാത്രം കാലിന് വയ്യായിരുന്നു. പക്ഷെ എനിക്ക് ഇപ്പോൾ നല്ല ധൈര്യത്തിൽ പറയാം, ഞാൻ മൂന്ന് മാസത്തിനകം നടക്കുമെന്ന്. എനിക്ക് ഉറപ്പാണ്', ആവണി പറയുന്നു.
ചേര്‍ത്തല ബിഷപ് മൂര്‍ സ്‌കൂള്‍ അധ്യാപികയായ ആവണിയും ചേര്‍ത്തല കെവിഎം എന്‍ജിനീയറിംഗ് കോളേജ് അസിസ്റ്റന്റ് പൊഫസറുമായ ഷാരോണും തമ്മിലായിരുന്നു വിവാഹം തീരുമാനിച്ചിരുന്നത്. തണ്ണീര്‍മുക്കത്തുള്ള ബ്യൂട്ടീഷന്റെ അടുത്തുപോയി മടങ്ങുംവഴി ആവണി സഞ്ചരിച്ച വാഹനം അപകടത്തില്‍പ്പെടുകയും നട്ടെല്ലിനും കാലിനും കൈക്കും പരിക്കേൽക്കുകയുമായിരുന്നു. ആദ്യം കോട്ടയം മെഡിക്കല്‍ കോളേജ് ആശുപത്രിയിലാണ് ആവണിയെ പ്രവേശിപ്പിച്ചത്. പിന്നീട് വിപിഎസ് ലേക്‌ഷോര്‍ ആശുപത്രിയിലേക്ക് മാറ്റി.
അപകട വിവരമറിഞ്ഞ് ബന്ധുക്കള്‍ ആശുപത്രിയിലേക്ക് എത്തി. വിവാഹം മാറ്റിവെയ്ക്കണമെന്ന അഭിപ്രായം ഉയര്‍ന്നെങ്കിലും ആവണിക്ക് കാര്യമായ പ്രശ്നങ്ങളില്ലെന്ന് ഡോക്ടര്‍മാര്‍ അറിയിച്ചതോടെ ആശുപത്രിയില്‍വെച്ചുതന്നെ താലികെട്ടാന്‍ തീരുമാനിക്കുകയായിരുന്നു. ഇതോടെ ആശുപത്രി അധികൃതര്‍ അതിനുള്ള ഒരുക്കങ്ങള്‍ ചെയ്യുകയും ഷാരോണ്‍ ആവണിക്ക് താലിചാര്‍ത്തി.
ആവണിക്ക് നട്ടെല്ലിനടക്കം ശസ്ത്രക്രിയ നടത്തിയിരുന്നു. കൊച്ചിയിലെ വിപിഎ ലേക്‌ഷോര്‍ ആശുപത്രിയിൽ ചികിത്സയിൽ തുടരുകയാണ് ആവണി. വിവാഹ സമ്മാനമെന്ന നിലയില്‍ ആവണിയുടെ ചികിത്സ ആശുപത്രി അധികൃതര്‍ സൗജന്യമാക്കിയിരുന്നു.
Content Highlights: Thank's to those who helped in danger avani's recovery story
